اللهم صلي وسلم وبارك على سيدنا محمد عليه أزكى الصلاة والسلام
يوم نشارك معاكم طريقة شراء سكن عن طريق بنك كناب CNEP وهو أفضل بنكي في رايي على خاطرش يساعد ناس كامل ومايطلبش منك تكون عامل أكتيف أي واحد يكون خدام وعنده شهادة العمل أو دخل ثابت وشهرية باينة يقدر يشري سيارة أو سكن على لكناب عادي بصح بالفوائد باينة هذي، قبل مانبدى هذي التدوينة للتوضيح فقط ، الربا تبقى ربا، مهم أي شيء لازم تفتح حساب في البنك كناب وكاين عدة حسابات بالفوائد وبدون فوائد وأفضلها تفتح كارني أو حساب بنكي للسكن أي كارني نتاع سكن على خاطرش مليح ويساعدك مثلا : تفتح كونت وكارني نتاع سكن راهم يمدولك بطاقة CIB تجبد بيها دراهم من ماشينا ومن أي بلاصة صح أهمية نتاع حساب سكن هو كاين مرات لكناب تشري سكنات من عند مقاولين وتعاود تبيعها بصح أول قبل ماتبيعها وتحسب فايدة نتاعها أول ناس تتصل بيهم أصحاب دفاتر أو حسابات السكن وتنقصلهم في ثمن السكنة وتساعدهم في القرض، تقدر تفتج كونت بمليون أو 500 ألف برك وتقدر تجبدها في أي وقت، حاجة أخرى إذا راك ولا راكي حابة تشري سكن عن طريق البنك من أحسن تشري عن طريق مقاول غير لأن الفائدة تقول 01 % برك أما من عند خواص تكون أكثر من 05 % ، مثلا سكنة دير 900 مليون كي تحب تشريها على شخص أنت كان في عمرك مثلا أقل من 40 سنة وتخلص مابين 5 إلى ستة ملايين البنك في هذي الحالة يمدلك تقريب 500 مليون برك وينحيلك 2.3 مليون في الشهر لمدة 30 سنة يعني يدوا معاك بزاف على هذي ننصح تشري من عند مقاول وتعطيه 10 % للمقاول والبنك يدعمك بالباقي90 % حاجة أخرى تقدر تشري سكنة أنت والزوجة نتاعك أو خوك أو أي واحد من عايلة وينحولكم في زوج من الشهرية يقسموا عليكم مبلغ الإقتطاع ،
الملف الذي لازم يكون عندك بعد ماتفتح حساب في البنك :
تكون جنسية نتاعك جزائرية ، شهادة ميلاد 12 ، شهادة الإقامة ،شهادة عمل والدخل لأخر 3 أشهر تالية بلي ثلاث شهر تالية كنت تخلص، تصريح سنوي Cnas لمزاونة المهنة بالنسبة للشركات الخاصة ، سجل الاعمال وبطاقة الضريبة ، شهادة التقاعد للمتقاعدين ، بيان الفائدة من دفتر الإدخار السكني لحكيت عليه في بداية هذا يساعدكم ، تفويض خصم مباشر موقع ومصادق عليه يعني تسني بلي ينحولك كل شهر مبلغ من الشهرية وثيقة تسني فيها وتقاليزيها تصادق عليها ،صك مشطوب شاك باري، زوج نسخ من عقد الملكية ، وعد البيع يصف السكن وموقعه بالدقة ، شهادة الرهن العقاري للسكن أو البيت العقار المراد بيعه، تقرير من طرف خبير صادر عن مهندس معماري أو مكتب التصميم معتمد لدى البنك لكناب، شهادة عائلية، نسخة من بطاقة الشفاء، نسخة من السجل التجاري ، شهادة الضريبة لآخر 03 سنوات ،
ملاحظة : هذه الوثائق ماشي بضرورة لناس كامل هي حسب العمل والمشتري ، واما بالنسبة للمقيمين في الخارج لازم وثائق تصادق عليهم القنصلية ،
رابط تحميل ملف الوثائق لمزيد من المعلومات :
الرابط الأول ، الرابط الثاني، الرابط الثالث.
